Зүүн хойд Азийн 15 дахь удаагийн экспо эхэллээ.
Зүүн хойд Азийн 15 дахь удаагийн экспо БНХАУ-ын Жилин мужийн Чанчун хотноо 8 дугаар сарын 27-ноос 31-ний өдрүүдэд "Зүүн хойд Азийн эдийн засгийг тэлж, хамтын ирээдүйг бүтээе" уриан дор зохион байгуулагдаж байна. Тус экспогийн нээлтийн ажиллагаанд Монгол Улсын Засгийн газрын гишүүн, Тэргүүн шадар сайд бөгөөд Эдийн засаг, хөгжлийн сайд Н.Учралын нээлтийн ёслолд зориулсан мэндчилгээг Эдийн засаг, хөгжлийн яамны Төрийн нарийн бичгийн дарга И.Батхүү хүргэж, экспогийн үйл ажиллагаанд амжилт хүслээ.
Мөн УИХ-ын гишүүн, Хууль зүйн байнгын хорооны дарга Д.Цогтбаатар болон Хүнс, хөдөө аж ахуй, хөнгөн үйлдвэрийн яам, Монгол Улсаас БНХАУ-д суугаа Элчин сайдын яам зэрэг төрийн байгууллага, Төв, Сэлэнгэ аймгийн төлөөлөгчид болон Монголын үндэсний худалдаа, аж үйлдвэрлэлийн танхимын удирдлагууд эдийн засгийн форумд оролцон, экспогийн үйл ажиллагаатай танилцаж байна. Манай улсын 20 гаруй аж ахуйн нэгж ноолуур, арьс шир, үслэг эдлэл зэрэг үндэсний үйлдвэрийн бараа бүтээгдэхүүнээ дэлгэжээ.
БНХАУ-ын Улс төрийн зөвлөлдөх зөвлөлийн дэд дарга Ху Чунхуа нээлтийн үгэндээ энэхүү экспо нь 20 жилийн өмнө зохион байгуулагдсан цагаасаа хойш нээлттэй, хүртээмжтэй хамтын ажиллагааны үзэл санааг баримталж, Зүүн хойд Азийн бүс нутгийн худалдаа, хөрөнгө оруулалтын хамтын ажиллагааг идэвхтэй ахиулж, бүс нутгийн эдийн засаг, худалдааны хамтын ажиллагааны хамгийн том, дээд түвшний индэр болоод байна хэмээн онцоллоо.
Монгол Улс, БНХАУ, ОХУ, Иран, Япон, Өмнөд Солонгос зэрэг орнуудаас гадна Жилин, Тайван, Хонконг зэрэг бүс нутгийн онцлог бараа бүтээгдэхүүний үзэсгэлэн гарсан байна. Энэхүү экспогийн үеэр ОХУ-ын бизнесийн өдөр, Хятад-Японы устөрөгчийн эрчим хүчний салбарын хурал, Хятад-Өмнөд Солонгосын эдийн засаг, худалдааны солилцооны хурал зэрэг арга хэмжээг зохион байгуулж, шинэ эрчим хүч, эрүүл мэнд, автомашин болон бусад салбар дахь харилцан солилцоо, бүс нутгийн хамтын ажиллагааг хөгжүүлэхэд чиглэсэн арга хэмжээнүүд болно.
